Түлекпен кездесу

Аудан: Тараз қаласы

Мектеп: №45 гимназия

Бүгін білім ордамыздың 1999 жылғы түлегі, халықаралық тележурналист, педагог-ғалым, қоғам қайраткері, филология ғылымдарының кандидаты, «Болашақ» халықаралық стипендиясының стипендианты, Қазақстан журналистер Одағы сыйлығының лауреаты, Қазақстан жастар Одағы «Серпер» сыйлығының лауреаты, «Батыс көрген» кітабының авторы, қазіргі таңда «Атырау» телерадиокомпаниясының басшысы Әуесбай Қанат Әуесбайұлы гимназияға арнайы ат басын бұрды. Қонақты домбырашылар ансамблі әсем күймен қарсы алды, ұлттық өнерге жаны құмар түлек өзі де домбырашылармен қосыла күй шертті, мың бұралған бишілер биін тарту етті. «Бітер істің басына, жақсы келер қасына» дегендей, танымал табысты түлек гимназияда бастау алған бірнеше игі істердің ашылуына қатысып, лентасын қиды. Елбасы Н.Ә.Назарбаевтың «Болашаққа бағдар – рухани жаңғыру» бағдарламасынан бастау алып, «Туған елге» ұласатын «Туған жер» бағдарламасының негізінде гимназияішілік Түлектер орталығы ашылды. Түрлі салада еңбек етіп жүрген гимназия түлектерінің табысты өмір жолын гимназистерге үлгі ету, насихаттау мақсатындағы орталық жұмысына Қанат Әуесбайұлы оң бағасын беріп, сәттілік тіледі. 11-білім алушысы Белгібаева Ғазиза гимназияның 1986 жылдан бастап, осы күнге дейінгі тарихы салынған гимназия сайты, виртуалды мұражайының жұмысымен таныстырды. Және бір игі бастама - гимназия өмірі, тыныс-тіршілігі, ұстаздар мен табысты түлектер түлектер туралы хабар беретін «45 life» арнасының тұсауы кесілді. Болашақта қарымды журналист болуды көздеген 8-сынып білім алушысы Сартбек Шадияр Әуесбайдың Қанатымен ашық сұхбат алаңында еркін пікірлесті. Сұхбат барысында қонақ мектептегі сәттерін сағынышпен еске алды, «Болашақ» стипендиясының шығармашылық өрлеуіне тигізген әсерімен бөлісті, соңында арна көрермендеріне ағылшын тілінде ыстық лебізін білдірді, түлектер кітабына қолтаңбасын, тілектер кітабына ізгі тілегін жазып қалдырды. Гимназия директоры Шортанбекова Фарида Советбекқызы Қанат Әуесбайұлына алғыс білдіріп, арнайы сертификат табыстады. Қанат Әуесбайұлы №51 орта мектепте ашылған қалалық Түлектер орталығында да болып, орталық жұмысына оң көзқарасын білдіріп, тілек кітабына ізгі лебізін қалдырды.